ଝର୍କା ସେପାଖର ଶୀତ

ଏଇ ଏବେଏବେ ଘର ଭିତରୁ

ବାହାରି ସାରିଛି ଶୀତ

ଦେହରୁ, ମନରୁ, ଭାବନାରୁ

କାହାର ଫୋନକଲ ରେ

ଅଚାନକ ଭାଙ୍ଗିଥିବା ନିଦ

ଲୋଡ଼େ ଉଷୁମ ଛୁଆଁ,

ଚା କପର ଖୁସୁବୁରେ

ଲେଖା ସରିଥିବା

ଦିନର ସାରଣୀ ଲାଗେ ନୁଆଁ l

ମୋବାଇଲ ର ମେସେଜ ସବୁ

ସେତେଟା ଉତ୍ସାହ ଦିଏନି

କାହାର ନିଶ୍ଚୟ ଆସିବ ଡାକରେ

ପାଦ ବଢେ …

ତଥାପି ଅଳସ ଭାଙ୍ଗେନି,

ବହୁତ ଦିନ ହେଲା

ୱlକ ରେ ଆସିନ

ଶୀତକୁ ଡ଼ରୁଛ….

ନା ପ୍ରତିଶୃତି କୁ ?

ରାତିର ସ୍ବପ୍ନ

ଅଧାଲେଖା କବିତା

ଦେହର ଉଷ୍ଣତା

କମ୍ବଳ ଭିତରେ ନିରୀହ ଲାଗନ୍ତି,

ବାହାରେ

ପଣତରେ କୁହୁଡି

ପାପୁଲିରେ ଶିଶିର

ଆଖିରେ କଅଁଳ କିରଣ

ଅପେକ୍ଷାରେ ଥାନ୍ତି l

ଅଧରାତି ଯାଏ ପଢିଥିବା

ମୋହଲଗ୍ନ ର କବିତା ସବୁକୁ

ଆଉ ଯାଏ ନାହିଁ ହାତ,

ଆକୁଳ ଆଶ୍ଲେଷର ଆଶାରେ

ଝର୍କା ସେପାଖେ ହାତ ଠାରୁଥାଏ

ସକାଳର ଶୀତ ll

—————–

ରତ୍ନମୟ ତ୍ରିପାଠୀ

ଅଧ୍ୟୟନ, ବଲାଙ୍ଗୀର