ମୌସୁମୀକୁ ସାକ୍ଷୀରଖି

ମୌସୁମୀକୁ ସାକ୍ଷୀରଖି

ଏବେ ସ୍ୱାଧୀନତା ଦେଲି

ସବୁମାନ ଅଭିମାନକୁ ଚାପିରଖି

କାଳକାଳ ଅପେକ୍ଷାର ବନ୍ଧନ ଖୋଲିଲି l

ଆଉ ମେଘକୁ ପଚାରିବିନି

ତୋର ଆସିବାକୁ ଡେରି ହେବାର କାରଣ

ମାଟିର ବାସ୍ନାରେ ଵି ଆଉ

ମତୁଆଲା ହେବନାହିଁ ମନ l

ପାରିବୁ ଯଦି ବାନ୍ଧିଦେ ତୋର

ଦୁଇଟିଯାକ ପ୍ରଜାପତି ଡେଣା

ଏବେ ତୋ ପାଇଁ ମୁକ୍ତ ସାରାଟା ଆକାଶ

ଉଡିବୁଲ ହେବାଯାଏ ବାଟବଣା l

ଅନିଚ୍ଛାରେ ହେଉପଛେ କେବେଯଦି

ଆକାଶରୁ ଦେଖାଯାଏ ମୋହରି ଅଗଣା

ଥରେ ଆସି ଦେଖିଯିବୁ

ତପସ୍ୱୀର ଜୀବନଟେ

କେମିତି ବିତୁଛି ମୋର

ପାଇବାକୁ ପ୍ରେମର ଠିକଣା l

ଭାବୁଅଛୁ ଯଦି ତୁହି

ଏହାମୋର ମିଛ ଅଭିମାନ

ପ୍ରତିଶୃତି ନେଇଯା ଆସି

ଏମିତି ବିତିବ ମୋର

ନିଃସଙ୍ଗ ଜୀବନ l

—————–

ରତ୍ନମୟ ତ୍ରିପାଠୀ

ଅଧ୍ୟୟନ, ବଲାଙ୍ଗୀର