ସମୟର ଅପେକ୍ଷାରେ….

ଶ୍ରାବଣ ବର୍ଷାରେ ଭିଜିଥିବା ମାଟିରେ

ବୁଣିଦିଅ ସ୍ମୃତିର ମଞ୍ଜିସବୁ

ସେ ଅଙ୍କୁରିତ ହେଉ କି ନହେଉ

ଆଶା ଓ ବିଶ୍ୱାସର ସାରଦେଇ

ବାଛିନିଅ ନିରାଶାର, ଅନାବନା ଘାସ l

ଅପେକ୍ଷା କର…..

ଅପେକ୍ଷା କର…

କିନ୍ତୁ

ଅମୃତ କାଳରେ, ରୋପିଥିବା ଗଛରେ

ଅମୃତ ଫଳିବ

ଏ ବିଶ୍ୱାସ ରଖନା

ଦୂର ଦିଗବଳୟରେ

ଦିଶୁଥିବା ଇନ୍ଦ୍ରଧନୁରୁ

ବାଛିନିଅ ତୁମକୁ ସୁହାଇଲା ରଙ୍ଗ

ରଙ୍ଗକୁ ନେଇ ରାଜନୀତି କର

ଈଶ୍ୱରକୁ ଗଢ଼

ନହେଲେ ନିଜେ ଈଶ୍ୱରଙ୍କ ଦେବଦୂତ ହୋଇଯାଅ l

ନୁଆଁ ଇତିହାସ ଗଢ଼ା ହୋଇସାରିଛି

ଏବେ ପାଟିବନ୍ଦକରି ସମର୍ଥନ କର

ରାଜଦାଣ୍ଡରେ ଛିଡାହୋଇ

ଘୋଷଣାକର ତୁମ ଜାତି

ତୁମର ଇତି, ତୁମ ଜନ୍ମମାଟି l

ନଦୀପଠାର କାଶତଣ୍ଡିରେ

ଲୁଚାଅନି ତୁମ, କଳଙ୍କିତ ଦେହ

ପାରିଜାତ ରଙ୍ଗରେ ଭିଜା, ତୁମ ମନକୁ

କେଉଁ ନଈପାଣିରେ ଧୋଇବ,

କେଉଁ ତୁଠରେ ଗାଧୋଇ

ପବିତ୍ର କରିବ ତୁମ ଆତ୍ମାକୁ

କେଉଁ ପାହାଡ଼ ଶିଖରକୁ ଯାଇ

ଘୋଷଣା କରିବ ତୁମ ଜାତୀୟତା l

ଅପେକ୍ଷା କର

ବୁଣିଥିବା ସ୍ମୃତିର ମଞ୍ଜିସବୁକୁ

ଚଟାଣ ଭେଦିସେ ଉଠିବ

ସଫଳତାର ଫସଲ ସାଉଁଟି

ପୁଣି ଏ ଜାତି ହସିବ l

—————–

ରତ୍ନମୟ ତ୍ରିପାଠୀ

ଅଧ୍ୟୟନ, ବଲାଙ୍ଗୀର